Dùgumasiri dɔ jɔra Toma Sankara 'tɔgɔ la Itali jàmana faaba la
Sɛrɛtigi Toma Sankara kɛra Burukina jàmanakuntigi ye kà tἑmɛ. 'Mɔ̀gɔ tɛ fìli ale tɔgɔ mà Fàrafinna tun. A bangera desanburukalo tìle 21, 1949 sàn Yako dùgu 'kɔnɔ, Burukina. Italikaw ye dùgumasiri dɔ jɔ a 'tɔgɔ la Rɔm. Dùgumasiri in kurunbokarila ɔkutɔburukalo tìle 24, 2026 sàn, Rɔm, Itali 'kɔnɔ. A dùgumasiri in bɛ Rɔm 'sìgida 3nan yɔrɔ la, min tɔgɔ dara a la kàbini 2025 sàn sɛtanburukalo tìle 17. Yèn ɲɛmaaw ni Burukina ɲɛmaaw ka hakilinafalen-falen kɔ fɛ, italikaw ka nìn wale in bɛ tàasibila kɛ kà ɲɛsin Toma Sankara ka hakilinaw ma, n'o y'a ka cɛsiri n'a ka timinandiya ye ka ɲɛsin a ka jàmana ma.
Yɔrɔ in dali Toma Sankara tɔgɔ la, o hakilina bɔra italika dɔ la, n'a tɔgɔ ye ko Mateyo Piyetoro Sante. Ale de kɛra 'sababu ye kà Itali sìgida ɲɛmaaw kùnnafoni Burukina jàmanakuntigi kɔrɔ in ka ko la k'a kɛ mìsali ɲùman ye Itali jàmana yἑrɛ ma.Toma Sankara tɔgɔlayɔrɔ in kɛra 'sababu ye kà gἑrɛɲɔgɔnya sinsin jàmana fìla ninnu ni ɲɔgɔn 'cɛ. Dùgumasiri in dilanna ni nἑgɛ ye min jànya bɛ se mɛtɛrɛ fìla la. A bònya ka sùrun 'mɛtɛrɛ 1 na. À jɔ̀ra dùgumasirijɔla Hamɛd Seku Watara fɛ. Burukina làadalako minisiri, Pɛndwɛnde Zilbɛr Wedarawogo ani kà fàra Màli ni Nizɛri cidenw kàn, olu bɛɛ tùn bɛ kurunbonkarili in kɛnɛ kàn kà fàra 'màa wɛrɛw kàn. Itali sìgida ɲɛmaaw y'a jìra ko Sankara ka hakilinaw ni à ka baara nàfa tɛ dàn Fàrafinna dɔrɔn mà, wa, k'a ka baaraw bɛ kɛ mìsali ye jàmana ɲɛmɔgɔw ma. Kɛnɛ in sìgibaaw y'a ŋàniya kà 'dùgumasiri wɛrɛ jɔ̀ burukina jàmana 'kɔnɔ ni dἑmɛɲinini ye jɛn bɛɛ fɛ. A mùsakako la, min dalakan ye ko "Tùfa kelen Toma Sankara tɔgɔ la". A jɔli bolodara Wagadugu 'kɔnɔ, Toma Sankara n'a ‘jἑɲɔgɔn 12 fàgara yɔrɔ min na, ɔkutɔburukalo tìle 15, 1987 sàn na. Italikaw ka nìn baara in ye 'bolomafara ye walasa Burukina 'jàmanakuntigi kɔrɔ in ka hakilinaw ka se kà dɔn 'jɛn bɛɛ fɛ.
Blàdon : 2026-11-07 Yɛlɛmako laban : 2026-11-07










