Tle nɔɔrɔminɛ: ʃu bɛ na kòko jòli Kɛ tle fɛ ɲinan?
Mɔgɔw delinnako ye kalo nɔɔrɔminɛ ye Mali 'kɔnɔ ni dɔw Ko a ma ko jakuma ka kalominɛ. Nka n'i Ko tle nɔɔrɔminɛ walima jakuma ka tleminɛ, mɔgɔw kɛ man di k'o Faamu. Nka, n'an ye mɔgɔ kɔrɔw Lamɛn, olu bɛ To k'a Fɔ ko ʃu Delila ka Kò tle fɛ nin sàn masina in na. N'an ye dɔnniya ka blàsiraliw Lamɛn, wali kelen n'an hakili bɛ 2013 sàn kalo 11nan tle 3 don na, karidonya dɔ, an ka kan k'a Dɔn ko tle nɔɔrɔminɛ kuma min bɛ da la nin ye ko sɛbɛkuma dòn.
2016 sàn in na, tle nɔɔrɔ minɛko 2 bɛ na Kɛ minnu bɛ na Ye ɲɛ gansan na. A min bɛ Kɛ fɔlɔ o bɛ Kɛ dɔnniyakalo kalo 3nan tle 8 walima o tle 9. O kɛlen tle flanan walima tle fɔlɔ ka kan ka Bɛn lasiri 3nan jɔli ma.
A kɛko flanan bɛ Kɛ kalo 9nan tle fɔlɔ walima o tle flanan. O ka kan ka Kɛ ka Kɔn selibakalo jɔli 'ɲɛ ni tle kelen ye.
Tle nɔɔrɔminɛ ni kalo ta bɛɛ bɛ Kɛ kalo kelen na ɲɔgɔn 'kɔ. Tle ta de bɛ Kɛ fɔlɔ ka Sɔrɔ ka kalo ta Da o kan. N'i ye tle nɔɔrɔminɛ fɔlen ninnu Kɔlɔsi ka Лɛ, i b'a Ye ko a kelen-kelen si ni a kalo ta kɛli cɛ janya tɛ Tɛmɛ tle 14 kan.
Tle nɔɔrɔminɛ ye tle ɲɛ zolomali ye fo k'a dɔw Se tle den dìbili ma ka ʃu Ko tlegan fɛ. A sugu bɛ sàba Bɔ ka tàli Kɛ tle ɲɛ minɛni fanga bònya kan: nɔɔrɔminɛ wɔlɔkɔlen, nɔɔrɔminɛ kɔgɔlen ani nɔɔrɔminɛ ɲaaminen. Tle ɲɛ zolomali sababu bɛ Bɔ kalo kɛcogo la ka dugukolo Lamini. Kalo dugulaminitɔ dòntuma dɔw la dugukolo ni tle yeelen 'cɛ, o bɛ Nà ni kalo ncɔndibi jɔli ye dugukolo yɔrɔ dɔ kan. O mana Bɛn ni dugukolo kanmɔgɔ minnu ka dugu ye, olu tɛ tle yeelen Sɔrɔ o furancɛ 'kɔnɔ. O bɛ Nà ni dìbi dònni ye tle fɛ walima ʃu kòli ye tle fɛ ni an Ko a ma yan ko tle nɔɔrɔ minɛni.
Tle nɔɔrɔminɛ mɛnnenba ye sanga 8 ye. A kɛko hakɛ ka ca sàn 'kɔnɔ ni kalo ta ye. Nka komin a bɛɛ tɛ Ye ka Lasaa ɲɛ gansan ka yeli la, walima komin a dɔw yɛrɛ tɛ Kɛ ka Bɛn dugukolo 'mɔgɔ-kɛyɔrɔ ma, a bɛ mɔgɔw ɲɛ na ko kalo ta ka ca n'a ta ye. 'Hakililajigin na, nɔɔrɔminɛ fàn o fàn, jamana bɛɛ mɔgɔ t'a Ye ɲɔgɔn fɛ. O kɔrɔ ye ko n'a Kɛra ka Bɛn ni dugukolo fàn min ye, k'o mɔgɔw de bɛ Bɔ a kàla ma.
Ncidɔri Sabaatɛ bolonɔ dòn
Blàdon : 2016-06-16 Yɛlɛmako laban : 2016-12-07
