Lakalita >
2016 sàn Foorila: 2017 Nàn'i Cooko kàban
2016 sàn Kɛra hɛrɛ ni baden na. O ye kuma ye min ka kan ni 'faamuyali ye k'i tɔ To. Bari, waati tɛmɛni dya n'a goya bɛ Lakali ni mankutu ɲuman ye n'a fɔbaa ka gɛlɛyaw ma Dankari a ni na walima n'u m'a ka adamadenya Dòn bɔgɔ la. N b'a fɛ Fo o yɔrɔ la ko n'a tìgi ma masiba wali bàna dɔ Sɔrɔ k'a Bali a kow la. N'o tɛ, a forobafɔli man nɔgɔ jama 'tɔgɔ la ko sàn Tɛmɛna koɲùman. Nka Mali 'kɔnɔ, an bɛ Se kà 'tanuli Kɛ bari a gɛlɛya ma sàn tɛmɛnen dɔw ta Bɔ. N 'kan Bɛ 2012 sànw n'a ɲɔgɔnnaw ma.
Fàkan fogo kùnkan-kunnafoniw la fɔlɔ, 2015 bɛ Ban don min, o y'a Sɔrɔ fàkan fogo fasiri mumɛ tùn tɛ Tɛmɛ 212 kan. Nka k'a Tà o dugujɛ la kà N'a Blà 2016 bandon na, fasiri min bɛ fogo 'kɔnɔ o hakɛ Yɛlɛnna ka Se 343 ma. O ye mankutu duman fɔlɔ ye fogo ma 2016 'kɔnɔ. Fogo dayɛlɛnni hakɛ tùn bɛ 118 571 na. Nka dayɛlɛnko Sera ʃyɛn 144 153 ma. O b'a Jira ko 2016 sàn dɔrɔn dayɛlɛnko Sera 69 178 hakɛ ma. O tɛ 'gansan ye fana bari an bɛ Se k'a Fɔ o la ko 2016 sàn dayɛlɛnko Gunna 70 000 na. 'Kodaminɛ na, o ye 'tɛgɛrɛfɔkoba ye fana n'i mɔgɔ min b'a Dɔn ko an ka kanw dòntɔ dòn blen fogoko ni latigɛdɔnkow la. Fogo yɛrɛ flɛli dya Sankɔrɔtara ja yeta cayali fɛ a ɲɛ fɔlɔ kan n'o ye "Dabɔ" ye. Fasiri kura 'fɛn o fɛn bɛ Blà a kan n'o ni ja dòn o ja n'o bamukan bɛ Nà ten kan "dabɔ" ɲɛ kan. Lafiyaba wɛrɛ Dònna a ko la k'o Kɛ fasiriɲini sonin fàrali ye a kan. I bɛ Se k'i kùn Jan k'i ka ɲininidakan dɔ Dòn o yɔrɔ la k'a Lajɛ n'o kùnkanfasiri bɛ fogo 'kɔnɔ. Fogo baaralaw ye cɛsiri ni ŋanaya taamaʃyɛnw Jira nin bɛɛ la. Fasiri b'a la Sɛbɛn cogo min na dɔ bɛ kà Fàra o kan kà T'a fɛ.
Mali 'kɔnɔ, 2016 sàn Kɛra maaba caman tunusan ye. O maabaw la, Amadu Jikɔrɔnin Tarawele b'o la. Ale tùn ye Mali in tu tigɛli cɛden dɔ ye. A ye jamana in jɔli baaraw Kɛ Modibo Keyta 'bolo fo kà Se o janfali ma 1968 sàn na. A fatuli Kɛra IBK min tle la, ale ye a ka cɛsiri Lakodɔn n'a jansali ye Mali jamana danbejala hakɛlama la. U y'a Kɛ Mali jamanajɔ' jàlatigi ye.
Dàn kelen wɛrɛ min Tununa 2016 sàn 'kɔnɔ o ye Kàlanfa Bakari Kamiɲa ye. Ale fana tùn ye Modibo 'baarakɛ-ɲɔgɔn ye. Kàlan sira kan, dɔnni selen tùn b'a 'bolo tarikudɔn ni sìgidɔn na. A ye kàlan jàlaba caman Sɔrɔ jamana 'kɔnɔ ani jamana kɔ kan. Ale fana ka magan Dɔnn'a ye cogo dɔ la jamana fɛ n'a jansali ye ni jamanajɔ 'danbejala ye.
An ka maa bannen dɔ fana Kɛra Tɛnɛman Sanɔgɔ ye, Lasidan Kɛnɛkaraba. Ale tùn ye ɲɔgɔlɔnbɔla ŋana ye Mali 'kɔnɔ. Hali n'a ma ʃì jan Sɔrɔ, sàn 53, a ye tɔgɔ ni mankutuba caman Sɔrɔ jabɔ siratigɛ la. Jamana fana y'a Lakodɔn n'a jansali ye jàla dɔ la.
Maaba caman Banna 2016 sàn 'kɔnɔ fo dɔw Ko IBK sɛgɛ Yɛlɛnna u la, ko IBK bɛ na jamana maaba bɛ Dun. Nka o y'a fɔcogo dɔ ye. N'o tɛ, jamana in ka yɛrɛmahɔrɔnya bɛ sàn 56 la ɲinan. O b'a Jira ko mɔgɔ minnu ye jamana ka lafiya kɛlɛ Kɛ, k'o tɔ bɛɛ kɔrɔlen dòn kosɛbɛ sa. Ni sàya tɛ sa, olu tɛ kà fosi Makɔnɔ blen. IBK nàli Bɛnna n'u caman ka ʃìse waati ye.
Koba dɔw Kɛra jyɛn 'kɔnɔ 2016 sàn in na. Fatuliw B'o la, jamanatigi-jigin B'o la ani fɛn caman wɛrɛw. Fatuliko siratigɛ la, Fidɛl Kastro ye Jyɛn To an ye, Kubakaw ka dànkelen kɔnin. Ale ye jamantigi kɔrɔ ani jyɛnyɛlɛma tìgilamaa ye min ye sàn 47 Kɛ a ka jamana 'kùn na sani a k'o ɲɛmaaya Di a yɛrɛ dɔgɔkɛ ma, Rawul Kastro. Ale tle la, a ɲɛkɔnniyabaa tùn ka ca jyɛn jamanaw la i n'a fɔ Etazuni yɛrɛ. A ye hakililakɛlɛ ni maralakɛlɛ caman Kɛ kà Se kà 'cogoya Di a ka jamana ma ni Risiw ka dɛmɛ ye.
Etazunikaw ka jamana-ɲɛmaasigi fana ɲinannama gintan Bònyana kà Tɛmɛ. O kàlata Kɛra Ilari Klintɔnn ni Donald Trɔnp 'cɛ. Ilari tùn ye jɛmuse tɔgɔlafanga-ɲinitɔn ka kanbɔbaa ye. Donald tùn ye Forobase tɔgɔlata ye. U ye a kùnkanw Dùuru k'u Daara fo Nà Se u wolomayɔrɔ la kà Bɔ ɲwaan na Nowanburukalo tle 8, 2016. 'Jyɛnmɔgɔ tlɛ Kɛra Donald Trɔmp tɛmɛnen na k'a sɔrɔ dasumu-sumukanw tùn b'a la kà tɛmɛbaa Kɛ Ilari ye a gintanw waati fànba 'kɔnɔ. Hali a ko Bàlara etazunikaw yɛrɛ la fo Ilari kanubaa dɔw tùn b'a Лinina ko kà 'segin Kɛ kàlata kan. Donald Trɔnp, ale min ye jamana waritigiba dɔ ye, bɛ na Sìgi a ka ɲɛmaaya wòlo kan 2017 01 20 don. O la, a Na Kɛ Etazuni jamanatigi 45nan ye. Ale na Fɔ Barak Obama 'kɔ wòlo kan. A y'i Kandi kàban ko ale tɛ na Se a ka ɲɛmaaya sàra ma, ko 'wariko t'ale la. A y'a Jìgi ko o wari na Kɛ kà musaka wɛrɛw Dakala jamana ye.
Blàdon : 2017-01-01 Yɛlɛmako laban : 2017-01-01
