Dɔnniya fòrobayali jὲmukan tàko 45nan
Làbɛn 4 : Nimadɔn
Dakun : Fàrisɛnsɛn mìnɛn
1. Fàrisɛnsɛn kofɔli
- Fàrisɛnsɛn Ye fàrikolo jinɔgɔw sɛnsɛnni ye kà Bɔ n’u ye ;
- O waleya bɛ Kɛ mìnɛn min fɛ fàrikolo la o la fànba Ye kɔmɔkìli ye ;
- O ni mìnɛn wɛrɛw bɛ Jὲ kà fàrinɔgɔbɔ baara Kɛ ɲɔgɔn fɛ.
2. Fàrisɛnsɛn mìnɛn fànw
- Fàrisɛnsɛn mìnɛn fànw bɛ ‘tàli Kɛ nìnnu na : kɔmɔkìliw, kɔmɔkilijuruw ani sugunɛbara ;
- Kɔmɔkìliw ye 2 ye filejolisira flà kinin n’a numan fɛ disikolo banyɔrɔ dùgumana na ;
- Ale ye ‘kùru blènmannin 2 ye minnu tɛ Tὲmɛ shìkɔlɔ bònya kan ;
- A bàra kelen-kelen bɛ falen Dòn kìsɛ-kisɛ miliyɔn kelen ɲɔgɔn na minnu bɛ Weele ko kɔmɔkilikisɛw ;
- O kɔmɔkilikisɛw ka baara ye fàriji ni jòlilafɛnw susuli ye k’u nɔgɔmayɔrɔw Bɔ u la ;
- Kɔmɔkilijuru kelen bɛ Bɔ kɔmɔkilibara flà bɛɛ la kà Jìgin kɔkolo kὲrɛ flà fɛ kà Nà sugunɛbara la ;
- Olu ɲὲci ye nɔgɔmafɛn jilama n’a ɲàgalama nɔɔninen lajiginni ye kà Bɔ kɔmɔkìli la kà Nà sugunɛbara la ;
- Sugunɛbara bɛ jinɔgɔ Màra dɔɔnin-dɔɔnin fo k’o Fà kà Se sugunɛ gànni ma a tìgi la ;
- Jinɔgɔ in bɛ Bɔ ɲɛgɛnɛ ye sugunɛbɔsira fɛ n’a Gànna a tìgi la ;
- Sugunɛ jìginbaliya a yὲrɛ ma kà Bɔ a bàra la o sababu bɛ Bɔ nfɔsɔn na;
- Nfɔsɔn de bɛ Funu ka sugunɛbɔsira da Nɔrɔ walasa sugunɛ kàna Bɔ a yὲrɛ ma ;
- Yànni denmisɛnnin ka Se sugunɛdanfɔsɔn in kɛli la kà sugunɛ Mìnɛ, ale sugunɛ bɛ Bɔ a yὲrɛ ma n’a Cayara dɔɔnin dɔrɔn ;
- O de b’a To denmisɛnw ka dlannaɲɛgɛnɛkɛ ka ca;
- Cὲ sugunɛbɔsira daminɛ la, lawakuru kɛlen Dòn k’o Lamini.
3. Bàna minnu bɛ kɔmɔkili Mìnɛ
- Bàna minnu bɛ kɔmɔkìli mìnɛ olu bɛ Tla flà ye : A dɛsɛlibanaw n’a dègunnibanaw ;
- Kɔmɔkìli dègunnibanaw dɔw ye : kɔmɔkilisobana (pyélonéphrite), sugunɛsirabana (tululopathie), kɔmɔkilikisɛbana (glomérulopathie), jòlibɔnɲama (hématurie), sɛmɛnanɲama (protéinurie), sugunɛdilanɲama (glycosurie), bɔ̀gɔsimibana (lithiase), kololanɲama (hypercalcémie) ani fàrilaminɛn ;
- Kɔmɔkilidɛsɛ bɛ Fɔ kà Kɛ suguba 2 ye : kɔmɔkilidɛsɛ gὲlɛman ani a sìginfɛta.
4. Kɔmɔkililabanaw furakɛli
- A bànaw bɛ Furakɛ cogoya 3 fɛ: furatafurakɛli, jòlisanuyafurakɛli ani kɔmɔkilifalen ;
- A furatafurakɛli bɛ Kɛ k’a jòliyɛlɛn n’a jòlidubaliya Furakɛ ;
- A jòlisanuyafurakɛli bɛ Kɛ ni a bànabaatɔ ladali ye kà mànsinw Dòn a la k’a jòli Kò ;
- Kɔmɔkilifalen bɛ Ye a furakɛli la ni kɔmɔkilidɛsɛ Juguyara kà Se a dàn na ;
- Kɔmɔkilifalen ye kɔmɔkìli dɛsɛlen bɔli ye a tìgi la k’a Nɔ̀nabla ni ‘kɔmɔkili wɛrɛ ye min Bɔra ‘mɔ̀gɔ wɛrɛ la ;
5. Dodaɲɛ sɔ̀rɔlenw blàli fransɛkan na
bɔ̀gɔsimibana = lithiase
fàrilaminɛn = calcul
fàrisɛnsɛn mìnɛn = appareil excréteur
filejolisira = aorte/ veine cave
furatafurakɛli = traitement médical
jòlibɔnɲama = hématurie
jòlisanuyafurakɛli = traitement par dialyse
kololanɲama = hypercalcémie
kɔkolo = colonne vertébrale
kɔmɔkìli = rein
kɔmɔkilifalen = transplantation, greffe
kɔmɔkilijuru = uretère
kɔmɔkilikisɛ = nephron
kɔmɔkilikisɛbana = glomérulopathie
kɔmɔkilisobana = pyélonéphrite
lawakuru = prostate
mìnɛn = appareil
nfɔsɔn = sphincter
ɲὲci = fonction, rôle
sɛmɛnanɲama = protéinurie
sɛnsɛnni = épuration, excrétion
sugunɛ = urine
sugunɛbara = vessie
sugunɛbɔsira = urètre
sugunɛdanfɔsɔn = sphincter rénal
sugunɛdilanɲama = glycosurie
sugunɛsirabana = tululopathie
Sunkofɔlan
Ballo, Issiaka, 2022, Enrichissement lexical du bamanankan : les appariements bamanan des dénominations françaises des concepts de la biologie humaine, Bamako, édis.
Ballo, Issiaka, 2019, Enrichissement lexical du bamanankan : les appariements bamanan des dénominations françaises des concepts de la biologie humaine (Thèse de doctorat, ULSHB - IPU).
Bordes, Gérard et al., 1980, Grande encyclopédie Atlas de la médecine, Bruxelles, Atlas.
Danbele, Mamadu, Sɔngomo, Sanusi, 2004, Dɔnniyakalan sàn 5nan-6nan, Bamakɔ, Edition Donniya.
Microsoft Encarta Collection, 2009, urinaire, appareil.
Blàdon : 2024-08-23 Yɛlɛmako laban : 2024-08-23
