Dɔnkili >
Sòlomann Tarawele: Nɛba Sòlo
Sòlomann Tarawele, n'à dɔnnen dὸn ni Nὲba Sòlo ye, ye Mali laadala-fɔlikɛla lakodɔnnenba dɔ ye. Nὲba Solo ka dugu tɔgɔ ye ko Nὲba. A Bangera yen fana. Sikaso màrabolo dùgu dɔ dòn, wa a n’o ‘cɛ jànya tɛ bɛrɛ Bɔ. O sababu in yɛrɛ de y'a To mɔgɔw y'a D’a la ko Nὲba sòlo. Sòlomann Tarawele bɛ laadalafɔlifɛn min Fɔ o ye bala ye. Bala ye sikasokaw ka fɔlifɛn mandi ye. A tùn bɛ Fɔ sὲnɛkɛlaw nɔ fɛ fɔlɔ k'u Ladusu ka dɔ Fàra u galabu kan foro 'kɔnɔ.
Nὲba Sòlo ka fɔliko Sɔrɔla a fà Zànnɔ Tarawele fɛ. O fana tùn ye balafɔla ye. O de y'a bolo Dòn balafɔ la sani o minniji ka Dɔgɔya.
Sòlomann yɛrɛ Labanna ka hakilina kuraw Tà a yɛrɛ ye a ko la. A n'a ɲɔgɔnna minnu ye bala Bɔ foro 'kɔnɔ k'a Kɛ ɲɛnajɛlan ye kɛnɛ wɛrɛw kan, ni Lamisa Bangali Bɔr'a la, ale ɲɔgɔn ka Dɔgɔ olu la. A ye 'fɛɛrɛ ɲɛnama Sɔrɔ a ta 'da la. Bala Kɛra jagokun ye ale fɛ.
Bala min tùn bɛ Fɔ sὲnɛkɛlaw lafali kamà, a ka c'a la o tùn bɛ Kɛ bala kelen walima flà ye. Nka Nὲba Sòlo ye fɔlifɛn wɛrɛw Tà ka Sogin bala la ka fɔlikulu (orchestre) Sìgi a 'tɔgɔ la. A ka fɔlifɛnw ye balaba ye, o min bɛ Fɔ àle Sòlo yɛrɛ fɛ. Fɔcogo la, a ni laadalabala tɛ Fɔ ka Taa fàn kelen fɛ. N'a bɛ a ka bala Fɔ, a b'a da Mìnɛ numan fɛ ka Taa kinin fɛ. Balaba tɛmɛnen 'kɔ, baladennin b'a la. O bɛ Fɔ ʃaaka Tarawele fɛ. Ale ye Nὲba Sòlo yɛrɛ dɔgɔkɛ ye, ba kelen fà kelen. Balaba ni baladennin 'kɔ, bàraba , bàradennin, yabara, kariɲan, flen ani sòku ye fɔlifɛn tɔw ye.
Nὲba sòlo ka bala yɛrɛ Dɔnna ni fɔlisen min ye o ye "Sama" ye. A dɔ̀nkili kɔnɔkuma Bòlila bolo kolonw hakilisigi-kumaw kan. A b'a Fɔ a 'kɔnɔ ko: Màsa min ye sama Da o kelen de ye mɛnɛmɛnɛ Da.O màsa in ma Лìnɛ sama 'kɔ wa à tɛ na Лìnɛ mɛnɛmɛnɛ 'kɔ. Nὲba Sòlo ka fɔlikulu tàamaʃyɛn ye kòoli ye ka sama kùnkolo ja K'o 'kɔnɔ ni ka sɛbɛnni K'a kan ko: "Nὲba sòlo". N'a Taara fɔli la jamana kɔ kan, Kɛrɛnkɛrɛnnenya la Faransi, u b'a Weele ko: l'éléphant Malien "Màli sama".
Blàdon : 2016-06-11 Yɛlɛmako laban : 2020-02-12
