Kr Dukure : bangeliko
Mamadu Fuseni Dukure y'a kùnditɔgɔ ye. A Bangera Tuuba, marakadugu min bɛ Bananba fɛ, 1939 sàn na. O y'a wolosan ye sɛbɛn ‘kɔnɔ, nɔntɛ, a yɛrɛ ‘ɲuman na, a ɲininkali dɔ 'sèn fɛ, a Ko ale bangesan yɛrɛ-yɛrɛ ka kan kà Kɛ 1936 sàn ye. A fà tɔgɔ ye ko Fuseni Dukure. A ba tɔgɔ ye Mariyam Dukure ye. A fà tùn ye flanin ye min flaninɲɔgɔn tɔgɔ tùn ye ko Lasina. A fàw bɛɛ lajɛlen tùn ye balemama naani ye : Sumana Dukure, u bɛɛ la kɔrɔ, Lasina ani fuseni Dukure ani u ka lagare Kisima Dukure. Kr Dukure ba n’a fà fla bɛɛ jamuw tùn ye Dukure ye. A fana mɔkɛ n’a mɔmuso fana tùn ye Dukure ye. Marakaw fɛ yen, o den sugu bɛ Weele ko ɲaamɛ.
Kr Dukure weeletɔgɔ fɔlɔ tùn ye Tata Haba (Tata fà) ye u ka du 'kɔnɔ a denkundi-tɔgɔ Mamadu kὲrɛ fɛ. Sababu min B'o la o ni tɔgɔ in yὲrɛ kɔrɔ Bɛ ɲɔgɔn na. Tata dɔ Kɛra Kr Dukure ba ma 'jìgi ye den in sɔ̀rɔliko la. O Tata fà tɔgɔ tùn ye ko Mamadu. Den sɔ̀rɔlen tɔgɔ Dara Tata o fà tɔgɔ la ka jìgiya Jànsa n'o ye. O la, Kr Dukure tùn bɛ Weele ko Tata Haba dukɔnɔmɔgɔ bɛɛ fɛ. Nkà wolo yὲrɛ nàcogo la, Kr Dukure ye a baden cὲman na flanan ye. Marakaw ka tabiya la, o den ni tɔgɔ min ka kan o Ye Tànba ye. N'a Weelela Tànba la, a fana b'o Laminɛ bari o fana y'a tɔgɔ dɔ ye. O siratigɛ yὲrɛ la, a mɔ̀den min Kɛr'a tɔgɔma ye dɔw b'o Weele ko Tànba.
Kr Dukure bangeli Bɛnna tubabutle ma. A Bɛnna n'o waati baaraba dɔ kɛli ye Mali ‘kɔnɔ tubabuw fɛ: Marakala jitɔnda jɔli. O tùn bɛ kà Jɔ kùn min kama tubabuw fɛ, n'o ye Jòliba mɔ̀ɔnɔ nafabɔli ye sὲnɛ sira fɛ, o sὲnɛ nata ye Dukure masaw Wuli kà Bɔ u fàdugu la kà T'u Sìgi Kokri malosɛnɛ-yɔrɔ min tɔgɔ ye Segukura. U n'u ka denmisɛnninw; Kr Dukure yɛrɛ fitininma tùn bɛ minnu na. U Nàn'u Sìgi dugu min na o ye Jòoro ye. Jòoro ni Marakala cɛ bɛ Taa bàm 60 la. A fàw blàli baara sàrantan na jitɔnda ni jifolonw ani digiba baara 'sèn fɛ, a denmisɛnnama ye dàmatɛmɛ-wale sugu bɛɛ dɔ Ye min tùn bɛ Da olu kan. U denmisɛndama de tùn bɛ Blà kà Taa dumunidi la u fàw ma o baara kɛyɔrɔ la.
Blàdon : 2016-06-27 Yɛlɛmako laban : 2019-11-01
