Dɔnniya fòrobayali jὲmukan tàko 49nan
Làbɛn 4 : Nimadɔn
Dakun : Namaji fàrilabɔcogo (système endocrinien)
1.Namaji kofɔli
Namaji, ni dɔw ko a ma ko jikuna, ye fàrikolo ka ji bɔta dɔ ye min ‘sèn Bɛ fàri laɲɛnamayali ‘sira caman na i n’a fɔ kùndanma jànyali, denwolo sababuyali ani fàriminɛn caman blàli u ka baara la ;
Namaji bɛ Bange kà fàrikolo Labɔ cogo min na o bɛ Weele ko namaji fàrilabɔcogo ;
Namaji bɛ Bɔ fàrikolo ‘yɔrɔ ni yɔrɔ k’a ka baara Kɛ ;
Dɔnniya min bɛ Bòli namaji kàlanni kan o bɛ Weele ko namajidɔn;
2.Namajiw bɔyɔrɔw fàrikolo la
Fàrikolo la, ni namaji ma Bɔ kùru bàralama dɔw fɛ, a bɛ Bɔ bùsiri dɔw fɛ ;
Namaji bɔyɔrɔ minnu ye kùru bàralamaw ye
- Namaji bàralama bɔyɔrɔ bɛ Dan kà Se fo 4 ma fàrikolo la : kùndanmabara bɛ dɔ Bɔ, mɔ̀bara bɛ dɔ Bɔ, kɔmɔkilikankuru bɛ dɔ Bɔ, denkisɛlan bɛ dɔ Bɔ, ani samanὲnɛ bɛ dɔ Bɔ ;
- Kùndanmabara (hypophyse) bɛ namaji min Bɔ o bɛ Weele ko kùndanmaji ;
- Ale ka baara fànba ye kolow jànyali ye ani namajibara tɔ̀ bɛɛ nunjuru mìnɛni ye ;
- Mɔ̀bara (glande thyroïde) ka ‘namaji bɔlen bɛ weele ko mɔ̀baraji ;
- Mɔ̀baraji bɛ fàriminɛn tɔ̀ bɛɛ ka baaraw Kɔgɔ u ‘bolo, sànko sɔ̀mi soba ka baaraw ;
- Kɔmɔkilikankuru, ni dɔw ko a ma ko dùsubɔbara, ka ‘namaji bɔlen bɛ Weele ko dùsubɔji ;
- Ale ‘sèn Bɛ dùsubɔlan (adrénaline) carinni na fàrikolo la ;
- Denkisɛlan (gonade) ka ‘namaji bɔlen bɛ Weele ko denkisɛji (hormone gonadique) ;
- O Ye ‘namaji ye min ka baara fànba bɛ Bòli bangeli koɲɛw kan ;
- Samanὲnɛ bɛ namaji min Bɔ o Weele ko samanɛnɛji;
- Samanɛnɛji sugu ye flà ye : samanɛnɛji (insuline) ni lanzeranji (glucagon) ;
- ‘Namajiw Dòn minnu ‘sèn Bɛ sukaro baarali la fàri la ;
- Samanɛnɛji yὲrɛ ye sukarodajiginnanba ye min Bɛ Tà sukarobana kὲlɛli ‘kan ma ;
Namaji minnu bɔyɔrɔ ye bùsiri dɔw ye
- Bùsiri minnu bɛ namaji bɔli fana Kɛ o bɛ dànsigiyɔrɔ 4 Bɔ : nùgumisɛn, tònso, kɔmɔkìli, ani sɔ̀n ;
- Nùgumisɛn ka ‘namaji bɔlen bɛ Weele ko nùgumisɛnji ;
- Namaji Dòn min sugu ka ca nùgumisɛn ‘kɔnɔ ;
- A ka baara bɛ Bòli dumuni bayɛlɛmani koɲɛw kan;
- Tònso ka ‘namaji bɔlen bɛ Weele ko tònsoji ;
- Tònsoji ye suguya danmadɔ ye : tònsolan (progesterone), gòsiliji (oestrogène) ani kɔnɔdɔnji (gonadotrophine chorionique) ;
- Tònsoji ‘sèn Bɛ den baloli koɲɛw la a ba dὲbɛ la ;
- Kɔmɔkili ka namaji bɔlen bɛ Weele ko kɔmɔkiliji;
- Kɔmɔkiliji bɛ Tla suguya flà ye u ɲὲci kosɔ̀n:jòlilaɲagaji (rénine) ani jòlikɔgɔji (érythropoïétine);
- Sɔ̀nkun ka ‘namaji bɔlen bɛ Weele ko sɔ̀nji
- Sɔ̀nji ka baara kɛta min Lakodɔnna fɔlɔ o ye kɔ̀gɔdajigin kɛli ye jòli la walasa kà jòlidigi bὲrɛ Bὲn.
3. Namaji fàrilabɔcogo nɔ̀fɛbanaw
- Dègun dɔw bɛ namaji fàrilabɔcogo Sɔ̀rɔ minnu caman sababu ye namaji bɔli dɔgɔya n’a dànmatɛmɛ dɔ la kelen ye;
- A dègun caman bɛ ‘tàli Kɛ namaji bɔyɔrɔ ka dègun sɔ̀rɔlen kan;
- Namaji nɔ̀fɛdegunw la kɛnɛkantaw ye : sukarobana, kùndanmabara fununi, shiɲama;
- O bɔlen kɔ yèn, namajiko ferekeli caman sababu bɛ Bɔ kùrusigiw la, namaji bɔta dɛsɛli, namaji labaaralanw damangoyali, sɔ̀misira ninabanni, wali kelen namaji yὲrɛ kὲlɛli fàritangalanw fɛ nìjuguyabana dɔ sababu fɛ.
4. Namaji bɔli karabali
- Bì-bi in na, namajiw bɔli tɛ làtigɛ ta kelen dɔrɔn ye i n’a fɔ fàrikolo bɛ minnu Labὲn;
- Лininibonw ‘kɔnɔ bì, mɔ̀gɔ bɛ kà namaji dɔw Dla kà furakɛli Kɛ n’u ye ;
- Komin làtigɛ ta dlalenw tɛ ‘bɔli Kɛ, namaji karabali Nàna ‘làfiyaba Dòn namaji nàfalama sɔ̀rɔli la a ‘tùma na;
- ‘Kɔ̀rɔlen kà Nà, ni màgo tùn Jɔ̀ra namaji dɔ ɲinini na bàna dɔ furakɛli ‘kan ma, màgo tùn bɛ Jɔ̀ shù 50 kùndanmabara bɔli la k’o furakɛli Kɛ;
- Kɔsa in na, namajiw dlali kɛlen ‘kɔ adamaden ‘bolokɔnɔfɛn ye ɲinini ‘sababu la, ‘nɔ̀gɔyaba Dònna o la ;
- O la, sukarobanatɔw ka sɔ̀gɔlifuraji caman ye samanɛnɛji dlalen ye ɲininibon ‘kɔnɔ;
- Kùndanmaji fana bɛ Labὲn mànsinw fɛ bì walasa kà kùndanmadegunw Furakɛ;
5. Dodaɲɛ sɔ̀rɔlenw blàli fransɛkan na
bùsiri = tissu
damangoyali = altération
denkisɛji = hormone gonadique
denkisɛlan = gonade
dùsubɔbara = glande surrénale
dùsubɔji = hormone surrénale
dùsubɔlan = adrénaline
fàriminɛn = organe
fàritangalan = anticorps
ferekeli = dysfonctionnement
gòsiliji = œstrogène
jànyali = croissance
jikuna = hormone
jòlidigi = pression sanguine
jòlikɔgɔji = érythropoïétine
jòlilaɲagaji = rénine
kɔ̀gɔdajigin = régulation de sel
kɔmɔkìli = rein
kɔmɔkiliji = sécrétion rénale
kɔmɔkilikankuru = glande surrénale
kɔnɔdɔnji = gonadotrophine chorionique
kùndanma = taille
kùndanmabara = hypophyse
kùndanmadegun = trouble de croissance
kùndanmaji = hormone hypohpysaire
kùru bàralama = glande
kùrusigi = tuméfaction
kùrusigi = tumeur
laɲɛnamayali = métabolisme
lanzeranji = glucagon
làtigɛ = naturel
mɔ̀bara = glande thyroïde
mɔ̀baraji = hormone thyroïdienne
namaji = hormone
namaji fàrilabɔcogo = système endocrinien
namajibara = glande endocrine
namajidɔn = endocrinologie
namajiko ferekeli = disfonctionnement hormonal
nìjuguyabana = maladie auto-immune
ninaban = stress
nùgumisɛn = intestine grêle
nùgumisɛnji = hormone
ɲininibon = laboratoire
samanɛnɛji = insuline
samanɛnɛji = sécrétion pancréatique
shiɲama = hirsutisme
sɔ̀mi soba = système nerveux central
sɔ̀misira = nerf
sɔ̀n = coeur
sɔ̀nji = facteur natriurétique auriculaire
sukarobana = diabète insulino-dépendant
sukarobanatɔ = diabétique
sukarodajiginnan = hormone hypoglycémiante
tònso = placenta
tònsoji = hormone placentaire
tònsolan = progestérone
Sunkofɔlan
Baalo, Isiyaka [Ballo, Issiaka], 2022, Enrichissement lexical du bamanankan : les appariements bamanan des dénominations françaises des concepts de la biologie humaine, Bamako, édis.
Baalo, Isiyaka [Ballo, Issiaka], 2019, Enrichissement lexical du bamanankan : les appariements bamanan des dénominations françaises des concepts de la biologie humaine (Thèse de doctorat, ULSHB - IPU).
Bɔrdɛs, Zerar [Bordes, Gérard] ani…, 1980, Grande encyclopédie Atlas de la médecine, Bruxelles, Atlas.
Danbele, Mamadu, Sɔngomo, Sanusi, 2004, Dɔnniyakalan sàn 5nan-6nan, Bamakɔ, Edition Donniya.
Microsoft Encarta Collection, 2009, endocrinien, système.
Blàdon : 2024-10-31 Yɛlɛmako laban : 2024-10-31
