Dɔnniya fòrobayali jὲmukan tàko 51nan
Làbɛn 4 : Nimadɔn
Dakun : Bangeli mìnɛn : mùso ta (L’appareil reproducteur femelle)
1. Bangli kofɔli
- N’an ko bangeli mìnɛn, adamaden ta de ko Dòn;
- Bangeli mìnɛn ye fàrikolo yɔrɔ minnu ‘sèn bɛ Ye bange sàbatili la;
- Bì tàko in na, kuma Bɛ mùso bangeli mìnɛn de kan, cὲ ta ‘ko tɛ.
2. Mùso bangeli mìnɛn kisa
- Mùso bangeli mìnɛn fànba Ye fàriso kɔnɔfɛnw ye, u tɛ kɛnɛ kan;
- U bɛ Tɛrɛmɛ kà Bɔ kɛnɛ ma kà Dòn kà Taa nìn cogo la: bìyɛ, bìyɛwo, denso, bangejuru, ani fanso;
- Bìyɛ Ye mùso bangeli mìnɛnw na kɛnɛkanfɛn ye min labὲnnen Dòn ni dawoloba 2 ni dawolonin 2 ye kà Fàra kere kan;
- Bìyɛwo ye sira manama ye min dònda nɔrɔlen Dòn ni tìnba ye mùso kɔgɔbali la;
- Denso Ye yɔrɔ ye den b’a ka kalo 9 fɔlɔ Kɛ min na fo a dònda bɛ Weele ko densoda;
- A forokolama Dòn ni dɔw b’a Weele ko dὲbɛ, ko “den B’a ba dὲbɛ la”;
- Denso labὲnnen Dòn ‘cogo la kà den ka ɲɛnamaya kùnfɔlɔ fɛn bɛɛ K’a ‘kɔnɔ i n’a fɔ densoɲaga n’a ɲɔgɔnnaw;
- A bùw labὲnnen Dòn ‘cogo la minnu bɛ bisili Kɛ u yὲrɛ ma kà den Labɔ jìginni selen;
- Bangejuru ye flà ye denso sanfɛla kὲrɛ flà fɛ;
- A jùru 2 bɛ da Mìnɛ denso la kà Yὲlɛn k’u Laban ni fanso kùruw ye kà densotlo fὲlɛfɛlɛw Biri olu ‘da la;
- Fansow ka baara Ye fankisɛw labὲnni ye u dali ‘kan ma ani namaji dɔw bɔli ye i n’a fɔ tònsolan (progestérone) ni gòsiliji (oestrogène);
- Den mùsoman bɛ Wolo ni a fansow falen ye fankisɛsere la, bàri u b’o Sɔ̀rɔ u ba fɛ;
- Den ka npògotigiya dabɔwaatiw fɛ, a ka fankisɛsere bɛ kɔgɔli Dabɔ kà Kɛ fankisɛ ye;
- O waati la, kalo o kalo, a fanɲɔrɔn dɔ bɛ Kɔgɔ kà fankisɛ kelen Blà kà Jigin bangejuru fɛ o dali ‘kan ma;
- O waleya bɛ Weele ko fankisɛda;
- Ni fankisɛ dalen ni cὲ làwakisɛ Bὲnna denso ‘kɔnɔ, o bɛ Nà ni denfan bangeli ye;
- Nkà ni kalo min fankisɛ dalen ni ‘làwakisɛ ma Bὲn ni ɲɔgɔn ye, fàrikolo laban b’o fankisɛ Tiɲɛ k’o Kɛ jòli ye kà Bɔ;
- O de bɛ Nà ni mùso ka kalolabɔ ye ;
- Mùso bɛ fankisɛ min Da o bɛ Sùrunya den 400 na a densɔrɔwaati ‘kɔnɔ.
3. Fàrankanminɛn minnu Bɛ bangeli mìnɛnw na
- Mìnɛn wɛrɛ minnu bɛ Fàra mùso bangeli mìnɛn fɔlen nìnnu kan olu caman ye ‘mìnɛnw ye minnu bàralama Dòn ;
- Sinbaraw B’o la, densotulubaraw (glande cervicale), bartolɛnkuruw (glande de Bartholin), tònso, ani kerekisɛ bɛɛ B’o la;
- Sinbaraw: Mùso sinw bɛ Yὲlɛma kà Kɛ sinbaraw ye denko ‘kan ma;
- Sinbaraw bɛ sinji Labὲn den ka mìnni ‘kan ma;
- Densotulubaraw bɛ densoɲaga Blà nɛma ‘kɔnɔ n’u tuluw ye;
- Bartolɛnkuruw Bɛ bìyɛwo ‘kɔnɔ kà To kà yèn Лigin;
- Tònso min bɛ Bɔ den fɛ jìginni na, ale fana ye mùso bangeli fàrankanmìnɛn dɔ ye;
- A bɛ balolan caman Lase den ma kà den To a ba dὲbɛ la;
- Kere fana Bɛ bangeli fàrakanminɛnw na;
- Denfan bɛɛ bɛ Tɔrɔ cὲya la fɔlɔ sàni dɔw ka cὲya kà Yὲlɛma kà Kɛ mùsoya ye;
- Kerekisɛ in ye cὲ fɔrɔkala nàgasilen ye mùsoya nàlen o nɔ̀ na;
- A ka baara ni cὲ fɔrɔkala ta bɛɛ ye ‘kelen ye kàfoɲɔgɔnya ‘kɔnɔ: wulili.
4. Bàna minnu bɛ bangeli mìnɛnw Sɔ̀rɔ
- Bàna minnu Bɛ mùsow Mìnɛ u bangeli mìnɛnw na olu ye: kalolabɔw ɲagamini, kònaya, fankisɛkogɛlɛya, fansolabonw, ani dògoyɔrɔlabana yὲlɛmataw;
- Kalolabɔ ɲagamini bɛ Bange ‘fɛn caman na i n’a fɔ gànkekɔnɔdimi (dysménorrhée), làadatigɛ (aménorrhée) walima fankisɛkogɛlɛya yὲrɛ;
- Fansolabon ye kèlebe kɛli ye kà mùso fànso mìnɛ.
5. Dodaɲɛ sɔ̀rɔlenw blàli fransɛkan na
bangejuru = trompe de Fallope
bangeli = reproduction
bangeli mìnɛn = appareil reproducteur
bartolɛnkuruw = glande de Bartholin
bìyɛ = vulve
bìyɛwo = vagin
dawoloba = grande lèvre
dawolonin = petite lèvre
denfan = œuf
denkisɛlan =gonade
denso = utérus
densoda = col de l’uterus
densoɲaga = mucus séminal
densotlo = pavillon
densotulubara = glande cervicale
fankisɛ = ovule
fankisɛda = ovulation
fankisɛkogɛlɛya = anovulation
fankisɛsere = ovocyte
fanɲɔrɔn = follicule
fanso = ovaire
fansolabon = cancer de l’ovair
gànkekɔnɔdimi = dysménorrhée
gòsiliji = oestrogène
jìginni = accouchement
kàfoɲɔgɔnya = rapport sexuel
kalolabɔ = cycle menstruel
kèlebe = cancer, tumeur
kere = clitoris
kònaya = stérilité définitive
làadatigɛ = aménorrhée
làwakisɛ = spermatozoïde
namaji = hormone
sinbara = mamelle
sinji = lait maternelle
tìnba = hymen
tònso = placenta
tònsolan = progestérone
tùfa = cellule
Sunkofɔlan
Ballo, Issiaka, 2022, Enrichissement lexical du bamanankan : les appariements bamanan des dénominations françaises des concepts de la biologie humaine, Bamako, édis.
Ballo, Issiaka, 2019, Enrichissement lexical du bamanankan : les appariements bamanan des dénominations françaises des concepts de la biologie humaine (Thèse de doctorat, ULSHB - IPU).
Bordes, Gérard et al., 1980, Grande encyclopédie Atlas de la médecine, Bruxelles, Atlas.
Danbele, Mamadu, Sɔngomo, Sanusi, 2004, Dɔnniyakalan sàn 5nan-6nan, Bamakɔ, Edition Donniya.
Microsoft Encarta Collection, 2009, reproducteur, appareil.
Microsoft Encarta Junior, 2009, Les organes génitaux et l’appareil reproducteur.
Blàdon : 2024-10-31 Yɛlɛmako laban : 2024-10-31
