Kr Dukure: jamana kɔ kan
Kr Dukure ka adamadenya bɛɛ ma Kɛ Mali 'kɔnɔ. A ye jamana caman Kɛ f'a ye dugu damadɔ yɛrɛ Kɛ a taajamana dɔw la. Mali kɔ kan, a ka jamana kɛlenw ye Senegali ye. A ye Sɛnluwi ni Dakar sìgi Kɛ yen. A ye Faransi Kɛ. A ye Bɔrdo ni Azaksiyo Kɛ yen. A ye Fribur Kɛ, Alemaɲi ani ka zenɛnf Kɛ Suwis. A ye Kuba Kɛ ka Akara fana Kɛ Gana.
Kr Dukure Senegali
K'a To Dakar1960 sàn, Mali y'a ka yɛrɛmahɔrɔnya Tà. Kr Dukure n'a kàlanden ɲɔgɔn bɛɛ Bɔra Ɛksanpronfɛnz kà Nà Dakar sannakalansoba la ko Dakar Fann n'a bɛ Weele bì ko Sannakalanso ʃɛk Anta Jɔp. A ye sàn kelen Kɛ yen kà sannajala Sɔrɔ yen. A ja min Flɛ sɛbɛnni numan fɛ nin ye, o Tàra k'a Bɔtɔ To gafesan-yɔrɔ la 1961 sàn na. A tùn Taara bangudɔn-basidɔn gafe dɔ Sàn gafefeere-yɔrɔ la.
K'a To Sɛnluwi
Mamadu Dukure y'a ka kàlanw da Minɛ Sudan (Mali tɔgɔ fɔlɔ) ‘kɔnɔ sa, nk'a m'u Foori yen. A Dònna kàlan na Segu k'a ka dugumakalan Foori yen. 1953 sàn na, a ye ɲɔgɔndan flà Sɔrɔ: Terasɔn de furzɛr kàlanso ta, n'a bɛ Weele bì ko Askiya Mohamɛd cɛmakalanso ani sorasi-kàlanso EMPA ta, o min bɛ Sɛnluwi, Senegali. A ye Sorasi-kàlanso Sugandi ka Terasɔn de Furzɛr To yen. O ye mɔgɔw Kabakoya kosɛbɛ. Nin waatiw y'a Sɔrɔ tubabutle bɛ 'sèn na. Dukure ye sìgi Kɛ Sɛnluwi sokala min tɔgɔ ye Dakar Bango ye, yenkaw ka sorasidaga bɛ yɔrɔ min na. A ka kàlanso tɔgɔ tùn ye ko EMPA. A ye kàlan sàn 7nan Kɛ yen ka Se a sàn 10nan ma.
Kr Dukure Ɛksanpronfɛnz, Faransi
Cɛmakalan dakun fɔlɔ sɔrɔlen, u mɔgɔ 10 de Sugandira ka Taa Ɛksanpronfɛnz sorasiya degeli kàlanso (Ecole Militaire preparatoire) la Faransi. A ye sàn sàba Kɛ yen ka cɛmakalan jàla Sɔrɔ yen.
Kr Dukure ka Bɔrdo sannakalandenya
Mamadu Dukure ye Bɔrdo Lasɔrɔ Mali ni Senegali ka farali 'sèn fɛ, sannakalan kɛli kamà. Ale y'a ka sannakalan Kɛ yen bangudɔn kan. A ni Fàrafinna kàlanden wɛrɛw tùn bɛ yen minnu tùn bɛ Bɔ dafɛjamana caman na i n'a fɔ Togo, Benin, Senegali ka Fàra Mali yɛrɛ kan. Ale n'a muso fɔlɔ tùn bɛ yen f'u y'u den fɔlɔ ni flanan Sɔrɔ yen 1964 sàn ani 1965 sàn na. Dukure y'a ka sannajala Sɔrɔ bangudɔn na 1965 sàn na ka Segin Mali ‘kɔnɔ o sàn kelen tɔ la. A nàlen Mali ‘kɔnɔ a y'a ka bangudɔn karamɔgɔya da Minɛ ENI na n'o tɔgɔ tùn ye ko ETP "Ecole des Travaux Publics" o waati la.
Kr Dukure tùn y'i To Bɔrdo kàlandenya la k'i Sèndon Mali kanw sɛbɛnniko ɲɛɲinini na kabi 1963 sàn na. Nka o waati y'a Sɔrɔ 'sigini ma Blà 'sèn kan kan ninnu sɛbɛnni na. Kr Dukure tùn y'i damanasigini Dla bamanankan na. Nka a seginnen 'kɔ ka Bɔ Faransi, UNESCO Nàna Lajɛ dɔ Kɛ 1966 sàn na kan ninnu siginiko kan Bamakɔ. O lasigi in Wolola sigini sɔrɔli la kanw na. Kr Dukure y'i ka sigini Blà o sigini latigɛlen kamà. Jamana minnu tùn b'o kɛnɛ kan olu ye Senegali ye ani Laginɛ.
Kr Dukure ka akarataa
Kabini Dukure Seginna Mali ‘kɔnɔ 1965 sàn na, a ma Bɔ blen fo 1996 sàn. A Bɔra o sàn k'a To setigi-kɔrɔsigiya la. A ka o taama o Kɛra ka Taa Gana kanko lasigi dɔ la yen. Tɔn min bɛ kàlanko Yiriwali cɛsiri la Fàrafinna ‘kɔnɔ ko A.D.E.A, o mɔgɔw tùn ye lajɛɛrɛ Boloda Fàrafinna kanw dònni kàlansow la o gὲlɛyaw n'a ɲɛsɔrɔko kan. Lasigi Kɛra Akara, ka Bɔ a sàn in kalo 8nan tle 26 la ka Se o tle 30 ma. Komin jamanaw kàlanko setigidaw tùn weelelen dòn a kɛnɛ kan, Mali setigi min tùn ye Adama Samaseku ye a waati la o ka taamakulu mɔgɔ dɔ tùn ye Dukure ye. U taara Mali ka kàlanso-kurako Kofɔ o kɛnɛ kan o min tùn ye Mali kanw dònni cogoya ye Mali kàlansow la. Jamana 19 ɲɔgɔn setigiw walima mɔgɔ bɔlen tùn bɛ a kɛnɛ kan.
Kr Dukure Kuba faaba 'kɔnɔ: Hanfaana
Jyɛn denmisɛn-jɛkulu tɔgɔla-ɲɛnajɛba dɔ Labɛnna Kuba. A tùn bɛ Mali ka mɔgɔ blàlenw na ka Taa o kɛnɛ kan 1978.
Kr Dukure ka dajirali Zenɛnf, Suwis jamana kan
Kr Mamadu Dukure Taara zenɛnf, Suwis, 2002 sàn na. A ka ɲininiw dajirali y'a Lase yen. A ye latigɛdɔn baara minnu Kɛ an ka kanw na, o jateblaw dajirili tùn laɲininen dòn jyɛn kokura-sinti ɲɛnabɔda mɔgɔw fɛ n'o damajira kɛnɛ bɛ Sìgi Suwis jamana ‘kɔnɔ sàn o sàn. A tùn Taara Mali kùnnawololi de kamà yen.
Blàdon : 2016-06-30 Yɛlɛmako laban : 2017-01-08
