Lakalita >
Olɛnpi fonɛnɛ farikolo-ɲɛnajɛw: Pyewɔncang 2018
Sàn naani o sàn naani, farikolo-ɲɛnajɛ dɔ gintan bɛ Kɛ jyɛn 'tɔgɔ la n'a bɛ Weele ko Olɛnpi farikolo-ɲɛnajɛw. A ɲinannama Dabɔra jumadon 2018 02 09. A gintan in labɛnni sagoya Dira Kore dɔ ma ko Tlebinkore n'o mɔgɔw y'a daga Sìgi u ka dugu dɔ la ko Pyewɔncang. Sàn naani kà Kɔ̀n ɲinan 'ɲɛ, 2014 sàn, a ɲɛnajɛ kelen in Labɛnna Risila fɛ n'o tùn bɛ Weele ko Soci ta, o Kɛra dugu min na o tɔgɔ ye min ye.
2018 sàn ta in n'a kɔnɔko bɛ ɲɔgɔn na fo k'a Fɔ a To tèn. A gintanw kɛli ye jamana 92 Kafo ɲɔgɔn kan Pyewɔncang 'kɔnɔ. O jamanaw 'cɛ la, Fàrafinna niyɔrɔ tàlen dòn jamana dɔw fɛ i n'a fɔ Nizeriya ni Sudafrik, Nɛlsɔnn Mandela ka jamana kɔni.
Olɛnpi bɛ na To 'sèn na tle 17 'kɔnɔ kà tlon caman Waleya. A ɲɛganko kɛta Taar'i Jɔ fo tlon 102 la ɲinan. A tlon dɔw ye marifaci ye, tɛrɛkuli, wolokili, o n'a ɲɔgɔnnaw.
Damanako caman Poyira labɛnw koɲɛw 'kɔnɔ ɲinan. O damanakow bɛ 'tàli Kɛ a labɛnjamana ni a kɛrɛfɛ-jamana cɛgɛlɛya kɔrɔw kan.
Kà kɔrɔ, Kore ye 'jamana ye Azi gun kan min Dyagoya-farala kà Bɔ ɲɔgɔn na 1948 sàn na k'a Kɛ jamana fla ye: Tlebinkore ani Kɔrɔnnakore. A jamana fla ninnu bɛ kὲlɛ sìgi 'kɔnɔ kabi u ka mugukanw Sumana 1953 sàn na. U tɛ Bɛn. Komin Olɛnpi labɛnni Dira a tlebinkore ma ɲinan, a kɔrɔnnakaw ye 'laɲini Kɛ a tlebinnakaw fɛ k'u kà Jὲ kà Kɛ kelen ye a ɲɛnajɛ in hukumu 'kɔnɔ. U Bɛnn'o kan minkɛ, u ye jɔnjɔn kelen Tà u fla k'u ka ɲɛnajɛ Kɛ o 'tɔgɔ la. U y'a kululaɲɛnajɛ dɔw yɛrɛ Kɛ ɲɔgɔn fɛ i n'a fɔ jamana kelen ka mɔgɔ bɔlenw.
A Kɛra 'sababu ye kà gɛrɛɲɔgɔnna-wale dɔw Ye Kore fla faamaw ni ɲɔgɔn 'cɛ. Kɔrɔnnakore jamanatigi, Kim Jɔng Unn, y'a ka fanga kankɔrɔ-sigi n'a yɛrɛ dɔgɔmuso Blà kà N'a kɛnɛ kan. O cidenkulu in Nàna ni bɛn laɲiniwale caman ye a fɛ kà Bɔ kɔrɔnnakore kà Лɛsin tlebinkore faamaw ma. Kim jɔng Unn ye cikan dɔ Ci tlebinkore ɲɛmaa ma min kɔnɔkuma ye ko sira bɛ o 'bolo kà Nà Bɔ ale ye kɔrɔnnakore. O ye 'ŋaniyajira ye mɔgɔ ʃi tùn ma Sìgi ni min ye jyɛn 'kɔnɔ u ni ɲɔgɔn cɛ gɛlɛyaw fɛ ani Kɔrɔnnakore yɛrɛ ka kelennabla fɛ jyɛnmɔgɔ fɛ.
Damanako wɛrɛ min bɛ olɛnpiko la ɲinan o dɔ fana ye Risila bòlikɛlaw yamaruyali ye waati labanw na u k'u Sèndon Pyewɔncang ta in na. An b'a Fɔ ko Risila tùn Лankera kabini waati jan k'a Sènbɔ jyɛn farikolo-ɲɛnajɛ gintanw na k'a sababu Kɛ ale ka bòlikɛlaw ka ŋanaya tùn ye kùnmayɛlɛmananw tàli nɔ ye 'dogo la. 'Bɔ Kɛra o ko bɛnbali in kan sàn min na, u tùn Sènbɔra ko bɛɛ la. Nka u ka bòlikɛla minnu tɔgɔ ma Ye o kùnmayɛlɛmananta la kosɛbɛ, koretaa da Yɛlɛnna olu 'ɲɛ. O mɔgɔ nàlenw ka jɔnjɔn fana Kɛra Olɛnpi tɔgɔlajɔnjɔn ye k'u Bali a kɛli la u ka jamana jɔnjɔn 'jukɔrɔ. Risila olɛpiden nàlen Sera mɔgɔ 168 ɲɔgɔn ma o kɛlen.
Olɛnpi fonɛnɛ farikolo-ɲɛnajɛ in kɛli sirilen bɛ waati cogoya dɔ kan n'o bɛ Weele ko "hiver" fransɛ la, o min ye waati dantigɛ dɔ ye a jamana ninnu kan. O waati in 'kɔnɔ, nɛnɛ bɛ Da fo ji bɛ Yɛlɛma kà Kɛ jimugu ye. Nɛnɛ jimugulama bɛ jigin i ko sanji fusufusu. A bɛ yɔrɔw Minɛ kà Kɛ jikuru dalen ye kà dugukolo Datugu. Yɔrɔ dɔw ta bɛ Kɛ kùlu mankanninw ye yɛrɛ. O ye Olɛnpi farikolo-ɲɛnajɛw kɛbaaw sago sɔrɔlen ye bari a ɲɛnajɛ fànba bɛ Kɛ o jimugu n'o jikuru fɛnsɛlen in san fɛ. N'a waatisugu in tɛ Kɛ jamana min na o 'sèn tɛ Olɛnpi labɛnni na. An y'a waati in Weele bamanankan ko "fonɛnɛ" bari a n'o bɛ 'tàli Kɛ ɲwaan na, n'o tɛ a waati in dàntigɛlen tɛ Mali 'kɔnɔ o min y'a To a 'tɔgɔ tɛ bamanankan na ka kɔrɔ n'a m'a tɔgɔ Karaba.
Blàdon : 2018-02-10 Yɛlɛmako laban : 2018-02-24
