Dɔnniya fòrobayali jὲmukan tàko 43nan
Làbɛn 4 : Nimadɔn
Dakun : Jòliwoyo mìnɛn : sɔ̀n
1. Jòliwoyo mìnɛn sun : sɔ̀n kofɔli
- Jòliwoyo mìnɛn sun ye sɔ̀n ye fàrikolo la, ni dɔw ko a ma ko dùsukun ;
- Sɔ̀n ye ‘fɛn bàralama ye disi ‘kɔnɔ wo Bɛ min ‘kɔnɔ, n’a bònya bɛ zàbankuru cogo la k’a girinya Se garamu 250 ɲɔgɔn ma baliku la ;
- A bàra bɛ Tla fànba 4 ye : sɔ̀ntlo flà ani sɔ̀nbara flà ;
- Sɔ̀nbu ye ‘bù hɔrɔnyalen ye, bù min y’i yὲrɛ Dànbɔ ‘bù gansanw cogoya la ;
- Sɔ̀n yὲrɛ bɛ Bange fàrikolo la kabini kɔnɔbara ‘kalo sabanan ;
- Sɔ̀n bɛ jòli baarali jɔ̀yɔrɔ Fa fàrikolo la ;
- A ka baara ye jòli cukubali de ye i n’a fɔ nùmuw ka fanfyɛlan : kà jòli Fòron, k’a Baara kàsɔrɔ k’a Fiyɛ kà Bɔ jòlisiraw fɛ;
- Cukubali ‘sèn fɛ, jòli bɛ Wòyo kà fàri Labɔ ‘sira kùnbaba 4 fɛ : jòliwoyoba sira, jòliwoyonin ta, fòorijoliwoyo ani sɔ̀nbufɛjoliwoyo.
2. Jòliwoyoba
- Jòli wòyoli min bɛ Bɔ numanfɛsɔ̀nbara la kà fàrikolo mùmɛ Balo kàsɔrɔ kà Nà Dòn kininfɛsɔ̀ntlo ‘kɔnɔ o de bɛ Weele ko jòliwoyoba ;
- A bɛ Weele tàn bàri jòli bòlili kùntaala ka jàn a sira in fɛ ni jòli wòyocogo tɔ̀ bɛɛ ye ;
- Jòliwogoba bɛ baara Kɛ ni jòliblensira ni jòlifinsira flà bɛɛ ye.
3. Jòliwoyonin
- Jòli bòlisira an’a bòlicogo min bɛ Bɔ kininfɛsɔ̀nbara la kà Tὲmɛ fogonfògon fɛ kàsɔrɔ kà Nà numanfɛsɔ̀ntlo ‘kɔnɔ o de bɛ Weele ko jòlibolinin ;
- A bɛ Weele tèn bàri jòli bòlili kùntaala man jàn a yɔrɔ la ;
- Jòliwoyonin ‘sèn fɛ, jòli bɛ Jèni fogonfògon ‘kɔnɔ k’a nɔgɔw Bɔ a la k’a Lakuraya ni ninan ye tugun ;
- Jòli sὲgɛnnen ‘se o se kininfɛsɔnbara ‘kɔnɔ, o waleya kelenw bɛ Bɔ a sira fɛ adamaden ka nimaya ‘kɔnɔ.
4. Fòorijòliwoyo
- Ale ye ‘jòliwoyo ye min bɛ Waleya nùguw ni biɲɛ ‘cɛ ;
- Jòli dɔ bɛ Bɔ nùgumisɛn na kà Taa biɲɛ na ;
- O jòli in bɛ làbɛncogo kura Kɛ biɲɛ ‘kɔnɔ walasa a kɔnɔfɛnw ka Se kà Nà ni balolanw ye nùgumisɛn jòlisira fɛ.
5. Sɔ̀nbufɛjoliwoyo
- Sɔ̀nbufɛjoliwoyo ye jòli bòlili ‘ko ye sɔ̀n sògo fɛ, kà sɔ̀n Bàlo balolanw ni ninan na ;
- A bɛ da Mìnɛ sɔ̀njurublen bolofara dɔ la kà Jìgin sɔ̀n sògo fɛ ni jòlisira mìsɛnw ye ;
- Sɔ̀nbufɛjoliwoyo bɛ nà Fòori kininfɛsɔntlo la numanfɛsɔntlo nɔ̀ na ;
6. Jòlitan kisa
- Jòlitan ye jòli digili ye jòlisira fɛ min sababu ye sɔ̀n ka jòliseri ye ;
- Jòlitan bɛ Dɔn i bolo dali la jòlisira kan fàri kan ;
- Jòlisira bɛ funukajigin min Kɛ, o de ye jòli tanni kisa ye.
7. Sɔ̀n kùnkanbanaw
- Bàna minnu bɛ sɔ̀n Mìnɛ, sɔ̀nnabanaw, olu ‘sèn Bɛ sàya sababu fɔlɔw la bì ;
- Sɔ̀nnabanaw bɛ Dan sugu 2 ye : Woloninye taw ani sɔ̀rɔli taw ;
- Woloninye ta fànba bɛ Bɔ sɔ̀nbara flà ɲɔgɔnlasɔrɔsiraw tiɲɛni na u dacogo la ;
- Sɔ̀nnabana sɔ̀rɔlen ye dègun dɔ kɛli ye kà sɔ̀n fàn dɔ Sɔ̀rɔ joginni dɔ bolo ma ;
- Sɔ̀nnabana fànba ye sɔ̀rɔli taw ye i n’a fɔ : sɔ̀nnamini taw, sɔ̀nkɔnɔfiri taw, walima sɔ̀nfiri yὲrɛ taw ;
8. Dodaɲɛ sɔ̀rɔlenw blàli fransɛkan na
balolan = nutriment
biɲɛ = foie
bù hɔrɔnyalen = tissu spécialisé
cukubali = pompage
fiyɛ = refouler
fogonfògon = poumon
fòorijoliwoyo = circulation porte
fòron = aspirer
jòli = sang
jòliblensira = artère
jòlifinsira = veine
jòlisira = vaisseau sanguin
jòlitan = pouls
jòliwoyo = circulation sanguine
jòliwoyo mìnɛn = appareil circulatoire
jòliwoyoba = grande circulation
jòliwoyonin = petite circulation
kininfɛsɔnbara = ventricule droit
kininfɛsɔ̀ntlo = oreillette droite
labɔ = irriguer
ninan = oxygène
nùgu = intestin
nùgumisɛn = intestin grêle
numanfɛsɔnbara = ventricule gauche
numanfɛsɔntlo = oreillette gauche
sɔ̀n = cœur
sɔ̀nbara = ventricule
sɔ̀nbufɛjoliwoyo = circulation coronarienne
sɔ̀nfiri = myocarde
sɔ̀njurublen = aorte
sɔ̀nkɔnɔfiri = endocarde
sɔ̀nnabana = cardiopathie
sɔ̀nnamini = pericarde
sɔ̀ntlo = oreillette
sɔ̀rɔli = acquis
woloninye = congénital
wòyo = circuler
Sunkofɔlan
Ballo, Issiaka, 2022, Enrichissement lexical du bamanankan : les appariements bamanan des dénominations françaises des concepts de la biologie humaine, Bamako, édis.
Ballo, Issiaka, 2019, Enrichissement lexical du bamanankan : les appariements bamanan des dénominations françaises des concepts de la biologie humaine (Thèse de doctorat, ULSHB - IPU).
Bordes, Gérard, 1978, Grande encyclopédie Atlas de la médecine, volume 3 et 7, Paris, Edition Atlas.
Microsoft Encarta Collection, 2009, corps humain.
Danbele, Mamadu, Sɔngomo, Sanusi, 2004, Dɔnniyakalan sàn 5nan-6nan, Bamakɔ, Edition Donniya
Blàdon : 2024-08-09 Yɛlɛmako laban : 2024-08-23
