Pɔrtigal Kɛra erɔp ntola ŋana ye 2016 sàn
Farikoloɲɛnajɛ-ko siratigɛ la, laadala-jɔnjɔn min bɛ Deli ka Da Erɔp jamanaw ni ɲɔgɔn 'cɛ n'a bɛ Weele tubabukan na ko: coupe d'euro, ɲina 2016 sàn ta Labɛnna ka Bɛn ni zuwɛnkalo ye. A ntola in sèn fɛ Erɔp jamana mugan ni tɔnɔntɔn (29) de ye ɲɔgɔn Sɔrɔ a kɛnɛ in kan. Fransijamana de Kɛra a koɲaw labɛnbaa ye, o siratigɛ y'a To a ntolatanw bɛɛ Kɛra olu fɛ yen. 2016 sàn Ero ntolatan fɔlɔ Kɛra Fransi ni Rumani fɛ. O ntolatan kùn Cɛra 02 ni 01 na Fransikaw kanu na.O Tɛmɛnen 'kɔ, a ntolatan kɔni Tora 'sèn na, fo ka na jamana 29 in bɛɛ Bìn k'a tɔ Purtugol/Pɔrtigal ni Fransi ye. O ŋanaɲini ntonlantan, n'an b'a Weele tubabukan na ko: Finale, o Bɛnna Zuluyekalo le 10 ma, 2016 sàn. A ntola Dara jamana fla ninnu ni ɲɔgɔn 'cɛ ka kɛɲɛ ni waati 19nan ye jɔyi. A ntolatan in daminɛ tùn Gɛlɛyara Pɔtigalkaw fàn fɛ kosɛkɛ k'a sababu Kɛ. Màa min tùn ye olu ka ntolatankulu ɲɛjɔyɔrɔ n'u jìgi ye, n'o ye Kristiyano ranaldo ye, ntolatan da minɛnen ni sanga muga ni duuru (25) ye ale ni fansikaw ka kalamanin seegin n'o ye Jimi payɛt ye, olu Nàna Tù ɲɔgɔn na. O Kɛra sababu ye ka Ronaldo Jogin ni k'a 'sèn Bɔ a don ntolatan tɔ la. O min Kɛra, pɔrtigalkaw jigi Misɛnyara nka u ma Sɔn k'u bolo Jigin fiyew. A ntolatan in Nàna Gɛlɛya k'a sababu Kɛ u ye sanga bi kɔnɔntɔn (90) bɛɛ Tan 00 ni 00 la. O kɔ fɛ sanga bi sàba (30) wɛrɛ Dir'u ma. U ye o sanga tan ni duuru (15) fɔlɔ fana Tan 00 ni 00 la. Nka sanga tan ni duuru laban tɔ tolen sanga Duuru (05) ye, pɔrtigalkaw ka kalamanin kɔnɔntɔn n'o ye Edɛr ye, ale Nàna ntola Sɔrɔ fransikaw ka jɔda la k'i 'sèn F'a la ni ka jɔn Yaara. O kɛlen, a ntolatan tɔ kùn Cɛra 01 ni 00 la pɔrtigalkaw kanu na. Pɔrtigal jamana Kɛra 2016 sàn Ero jɔnjɔn ŋana ye. An b'aw hakili Jigin k'a Fɔ nin ɲɛnajɛ in da minɛni Erɔpkaw fɛ fo ka na Blà bì la jamana kɔnɔntɔn de y'a ŋanaya Sɔrɔ. Nka ɲina 2016 sàn in ta tali pɔrtigal fɛ o b'a Dafa jamana tan na, bari nin ye pɔrtigal ʃyɛn fɔlɔ ye k'a Tà.
Blàdon : 2016-07-13 Yɛlɛmako laban : 2017-01-07
