Dɔnniya fòrobayali jὲmukan tàko 39nan
Làbɛn 4 : Nimadɔn
Dakun : Kasa sɔ̀minan (Nun)
1. Fàrikolo sɔ̀minan 5 hakililajigin kɛli
Yeli sɔ̀minan, mɛnni sɔ̀minan, màganna sɔ̀minan, nɛnɛni sɔ̀minan, kasa sɔ̀minan.
2. Kasa sɔ̀minan kofɔli
- Nun Ye kasa sɔ̀minan de ye fàrikolo la ;
- A Bɛ ɲɛda kan, k’a da Mìnɛ ɲɛ flà ni ɲɔgɔn ‘cɛ kà Nà sanfɛdawolo ‘kùn na ;
- Jɔ̀daba sàba Bɛ nun na fàrikolo la : kasa sɔ̀mi sɔ̀rɔli, ninakili bɔli, ani kuma dὲmɛnan ;
- A bɛ kasa sɔ̀mi sɔ̀rɔli min Kɛ, an màgo B’o de la yàn.
3. Kasa sɔ̀mi sɔ̀rɔli mìnɛnw
- Nun ye kasa sɔ̀mi sɔ̀rɔlan ye adamaden fàrikolo la ;
- Nun bɛ Tla fàn flà ye : fàn yeta ani sokɔnɔfan ;
- Nun fàn yeta ye bàra sɛɛnɛnen ye ɲɛda cɛmancɛ la kà Jìgin ;
- ‘Si kùnba kɛlen Bɛ kà nunwo kɔnɔna Labɔ kà Taa ;
- Nun wò flà dànbɔlen Dòn ni sògofalaka dɔ ye ;
- Nunkolo yὲrɛ labὲnnen Bɛ ni gòlo ni nunbɔlɔkolo ye ;
- Nun sokɔnɔfan bɛ Dabɔ nunkolowo flà ma, nunbara wò flà bɛ Taa Bìn minnu kan kùnkolokolo la ;
- Nun sokɔnɔna dlalen Dòn kolosu sugu dɔw la minnu da-dalen Dòn ɲɔgɔn ‘kɔ ‘fàra ni ‘fàra kà Taa, ani ntɛgɛnɛnkolow fo kà Se tloburu ma ;
- Birifini ɲὲcimaba dɔ Bɛ nun sokɔnɔna wò-wow la min bɛ Weele ko gòlofɛɛnɛ ;
- O gòlofɛɛnɛ la, kasa sɔ̀mi sɔ̀rɔli sàgoya dilen Bɛ yɔrɔ dàntigɛlen dɔ ma mɔ̀gɔ fari la ;
- Sɔ̀misiraw kɛlen Bɛ kà nun gòlofɛɛnɛw Labɔ minnu bɛ Nà kà Bɔ kùnkolosɛmɛ na ;
- Nun bangeli fàrikolo la, o bɛ Dabɔ kabini kɔnɔbara dɔgɔkun sabanan waati ;
- O waati la, nun mìnɛnw bɛ Labὲn kà Bɔ busugu dɔ la ko nɔrɔlibusiri ;
4. Nun mìnɛnw ka baara
- Wo minnu Bɛ nun na, nunwo ani nunkolowo, olu ka baara ye fiɲɛ latὲmɛni ye ;
- Nunwolasiw bɛ fiɲɛ ‘sɛnsɛnko fɔlɔ Kɛ kà ‘bùruburu kùnbaw Bɔ a la ;
- Nunso kolosuw ka baara fànba ye ka bùruburu mìsɛnw Sɛnsɛn kà Bɔ fiɲɛ na ;
- Ntɛgɛnɛnkolow bɛɛ ‘sèn Bɛ fiɲɛ sɛnsɛnni na : nunsontɛgὲnɛn ni sìgilanntɛgὲnɛn ;
- Wò-wo minnu Bɛ ntɛgɛnɛnkolow ni ɲwaan ‘cɛ kà Taa, olu ka baara ye fiɲɛ dònnen nɛɛmayali bὲrɛbɛnni ye;
- Tloburu bɛ baara min Kɛ, o ye tlo ni nun flà jὲlen ka sɔ̀mi baarataw cɛlabɛn kɛli ye ;
- Gòlofɛɛnɛ min dalen Bɛ a yɔrɔw kan, o labɔlen Dòn fiɲɛ susulanw ni tàngalanw na ;
- O gòlofɛɛnɛ min bɛ Weele ‘kɛrɛnkɛrɛnnenya la ko kasa gòlofɛɛnɛ, o ka baara ye kàsa suguyaw bosoli ye k’olu Lase kùnkolosɛmɛ ma ;
- Kùnkolosɛmɛ yɔrɔ min sògo bɛ kasa lakodɔnni kan, o bɛ Sɔ̀rɔ ka kasa bosolen suguya Fɔ mɔ̀gɔ ye ;
5. Gὲlɛya minnu bɛ kasa sɔ̀mi sɔ̀rɔli Sɔ̀rɔ
- Gὲlɛya minnu bɛ nun Sɔ̀rɔ, olu la fànba Flɛ : tìsoli, nunci, mùraw, ani fàrikɔnfɛn kasalamaw ;
- Tìsoli ni nunci flà bɛɛ ye fàrikolo ka yὲrɛbɔbolofɛɛrɛ (mouvement reflexe) dɔw ye ;
- Mùra fànba sababu bɛ Bɔ sàngaranw na ;
- Fàrikɔnfɛn caman bɛ Càrin fiɲɛ fɛ minkὲ, jirifeerekasaw ni tòlifɛnkasaw fɛ, o caman bɛ dègun Lase kasa sɔ̀minan ma ;
6. Dodaɲɛ sɔ̀rɔlenw blàli fransɛkan na
bosoli = analyse, interprétation
falaka = cloison
fàrikɔnfɛn = allergie
gòlofɛɛnɛ = muqueuse
kasa gòlofɛɛnɛ = muqueuse olfactive
kasa sɔ̀minan = organe de l’odorat
kasa sɔ̀misira = nerf olfactif
kolosu = cartillage nasal
nɔrɔlibusiri = tissu conjonctif
ntɛgɛnɛnkolo = os sinusoïdal
nunbɔlɔkolo = septum nasal
nunci = hémorragie nasale, épistaxie
nunkolowo = fosse nasale
nunwo = narine
sàngaran = virus
sɔ̀minan = organe de sens
sɔ̀misira = nerf
tloburu = trompe d’Eustache
yὲrɛbɔbolofɛɛrɛ = mouvement reflexe
Sunkofɔlan
Ballo, Issiaka, 2019, Enrichissement lexical du bamanankan : les appariements bamanan des dénominations françaises des concepts de la biologie humaine (Thèse de doctorat, ULSHB - IPU).
Bordes, Gérard, 1978, Grande encyclopédie Atlas de la médecine, volume 5, Paris, Edition Atlas.
Microsoft Encarta Collection, 2009, Nez, organe de l’odorat.
Blàdon : 2024-08-09 Yɛlɛmako laban : 2024-08-09
