Taraso2 - Fàkan

Taraso II Hɛrɛmakɔnɔ

Dugu yɔrɔfɔli

Taraso II bɛ Kucala kolomi fɛ Sikaso marabolo 'kɔnɔ, Koloniŋɛ galoda 'kɔnɔ. Jamanatigi-duguko tle la, Molobala tùn ye a ka jamanatigi-dugu ye. O Molobala kelen Tlara ka Kɛ a ka kafoda ye. Bi-bi in na, Molobala yɛrɛ ye Koloniŋɛ galoda galotigi-dugu ye. Lamini na, Taraso bɛ Fɔ duguba min fɛ kosɛbɛ o ye Kucala ye, a ni min cɛ ye bam 50 ye.

Dugu tɔgɔko

Taraso II, ni Hɛrɛmakɔnɔ bɛ Fɔ ka Fàra a tɔgɔ kan, ye Koloniŋɛ galoda dugu dɔ ye.Taraso II mɔgɔw Bɔra dugu dɔ la ko Taraso. A tɔgɔ ma Yɛlɛma ka Bɔ o dugu tɔgɔ la nka flanan (II) dɔrɔn Fàrala a tɔgɔ kan k'o Dànfara ka Bɔ a bɔdugu ta ma.

Dugu dugutigiya

Taraso II tìgiya bɛ dugutigi 'bolo. Faama-dugutigiya bɛ u fɛ yen. Dugu tìgiw ye Tarawelew ye. Ni dugutigi kura bɛ Sìgi, sugandili bɛ Kɛ Tarawelew 'cɛ la. Kɔrɔyako tɛ yen dugutigiya ye.

Taraso II ye 'dugu ye min tùn bɛ Jate buguda ye sani a k'a ka duguyasɛbɛn Sɔrɔ 1998 sàn kalo 09^nan tle 21. A tu Tigɛra mɔgɔ min fɛ o tɔgɔ ye ko Fatɔgɔma Sidiki Tarawele. Ale ye sɛnɛkɛla ye. A Wulila ka Bɔ Taraso, n'o fana bɛ Weele ko Tarakan, ka Nà i dàntɔgɔla-dugu Sìgi k'o tɔgɔ Da ko Taraso II.

Dugu bònya

Taraso II Hɛrɛmakɔnɔ tɛ dugu belebele ye. Dugu ye kìn kelen pe de ye. A kɔnɔmɔgɔ ye mɔgɔ 358 ɲɔgɔn ye. A sìgikɛnɛ man bon kosɛbɛ.

Taraso II bɛ sìgiyɔrɔ min na bì o y'a sìgiyɔrɔ flanan ye. A sìgiyɔrɔ fɔlɔ tomon bɛ yen. O bɛ Weele ko Polɛrɛ tomon.

Dugu siyako

Siya caman tɛ Taraso II 'kɔnɔ. Miɲankaw dɔrɔn de bɛ yen. Jamu kelen de bɛ dugu 'kɔnɔ n'o ye Tarawele ye. Kan minnu bɛ Fɔ Taraso II mɔgɔw fɛ olu ye mamara (miɲankakan) ni bamanankan ye. O kan fla la, mamara de fɔli fanga ka bòn ni bamanankan ta ye.

Dugu baarako

Baara sugu caman bɛ Kɛ Taraso II. Sὲnɛ y'a baaraw la fànba ye. Sὲnɛfɛn minnu bɛ Sὲnɛ yen olu Flɛ: kɔɔri, keninke, saɲɔ, tiga, ʃɔ, bεnε, soza, zεrε ani malo.

Sὲnɛ bɔlen 'kɔ a la, nakɔko fana fanga ka bòn yen. Jiriforo sugu minnu bɛ yen, olu Flɛ: mangoro, lenburu, manje, sɔmɔ. U ka nakɔlafεn kɛnɛ sɛnɛtaw ye gan, salati, jaba, ʃù, fòronto ani nafεn wεrεw ye.

Baganmara siratigɛ la, u bɛ misi, saga, bà, fàli ninnu bɛɛ dɔ Mara. Tarasokaw fana bɛ kamanmafɛnw Mara i n'a fɔ ʃε, kami, tonkɔnɔ ani kɔnɔ.

Mɔni bɛ Tarasokaw ka baaraw la. Laadalamɔni na, u bɛ mɔni Kɛ ni jɔ, zɔlɔ ani pɔpɔlɔ ye. O mɔni ninnu kɛyɔrɔw ye nungtaan, lɔcoy, buguulokɔ, sidiki wii mɔnikɛ-yɔrɔw ye.

Tarasoka bɛ jago fana Kɛ. A ka jagofɛnw ye sɛnɛfɛnw ye. Dɔw bɛ butikifeere ni baganfeere Kɛ. Taraso ye lɔgɔdugu ye. A sugu bɛ Jɔ taratadonya fɛ.

Donsoya dɔɔnin bɛ Kɛ Taraso. Bololabaara misɛnnin minnu bɛ Kɛ yen o dɔw ye motodla ye, jiriʃi ani geseda.

Dugu yiriwaliko

Yiriwa sira caman Dayɛlɛnna Tarasokaw ye bìkow la. Yɛlɛma kura caman Dònna Taraso II dugu kow la i ko kɛnɛyaso ni denjiginso. Baarakɛminɛn kura dɔw Nàna dugu ’kɔnɔ i n’a fɔ ɲɔʃimansin ni jabarin. Kɔɔrisugu ni motow ani kalalikɛmansinw bɛɛ b'o la. Sɛnɛkɛ-mansinw ni wotorow fana bɛ dugu 'kɔnɔ bì.

Baɲuman-kεtɔn sìgiyɔrɔma caman Nàna ni yiriwa siraw ye dugu ma. K'a Tà baɲuman-kɛtɔnko daminɛ na Mali 'kɔnɔ ka Nà Se sisan ma, Taraso II ni baɲuman-kɛtɔn caman ye baara Kɛ ɲɔgɔn fɛ dugu ɲɛtaasiraw fɛ. O baɲuman-kɛtɔnw la fànba ye PACR, PGT, PGR, CMDT ye.

Baɲumankɛtɔn minnu ni dugu bɛ baara la halibi olu ye PGR, CMDT, CVC, USAID, CRC.

U kelen-kelen ye yiriwalisira minnu Dòn dugu 'kɔrɔ olu Flɛ:

PACR : dugumɔgɔw kàlanni ʃεmara kεcogo ɲuman na, denjiginso jɔli

PGT: kùnnafonidi kεcogo dugudenw ye

PGR: dugumɔgɔw kàlanni sεnεfεnw jate bɔcogo ɲuman na

CMDT : kɔɔrisεnε yiriwali

CVC : dugumɔgɔw kàlanni ɲɔsεnε yiriwali la

CRC : dugumɔgɔw kàlanni sumanʃiw lasagoko ɲuman na ani dugukolo-sεgε kεlεli.

Dugu kàlanko

Kàlanyɔrɔ dànsigi-yɔrɔ fla ye ɲɔgɔn Sɔrɔ Taraso II dugu 'kɔnɔ: Madarasa ni balikukalan. Madarasa Jɔra dugu 'kɔnɔ kabini 1986 sàn na. Balikukalan Nàna o 'kɔ sàn kelen, kɛrɛnkɛrɛnnenya la 1987 sàn. Madarasa ye kàlanso 2 ye min dakun fɔlɔ ye sànwɔɔrɔ-kalan ye nink'a dakun flanan Kɛ sànsaba-kalan ye. Baliku-kalanso ye kàlanso 1 ye. Madarasa de fanga ka bòn ka sago kàlan tɔw kan.

Dugu batoko

Diinɛko siratigɛ la, bato min bɛ Taraso 'kɔnɔ o ye silamɛya ye. Diinɛ wɛrɛ tɛ yen fɔlɔ. Misiri kelen bɛ dugu la silamɛya faridaw bɛ Latlen min na. Silamɛya yɛrɛ Dònna dugu 'kɔnɔ mɔgɔ min fɛ o tɔgɔ ye ko Fatɔgɔma Sidiki Tarawele. A Dònna 1982 sàn na ka dugu To bugudaya.

Dugu ɲεnajεko

Taraso ɲɛnajɛko ka ca. Лɛnajɛ minnu ye gintannako ye dugu 'kɔnɔ olu ye dugu ka yεrεta sanyεlεma ye, kɔɲɔ, seli, denkundi ani kuranεjigin. A ɲɛnajɛ ninnu fɔliminɛn fànba ye bɔnɔ ni flen ye.